വരാനിരിക്കുന്ന ഇവന്റുകൾ

കേരളത്തിലെ പ്രശസ്തമായ മരിയൻ തീർത്ഥാടന കേന്ദ്രങ്ങളിലൊന്നാണ് കൊരട്ടി സെന്റ് മേരീസ് ഫൊറോന പള്ളി. എല്ലാവർഷവും ഒക്ടോബർ മാസത്തിലാണ് ലോകപ്രശസ്തമായ കൊരട്ടിമുത്തിയുടെ തിരുനാൾ ആഘോഷിക്കുന്നത്. ജാതിമത ഭേദമന്യേ ലക്ഷക്കണക്കിന് തീർത്ഥാടകരാണ് തിരുനാൾ ദിനങ്ങളിൽ കൊരട്ടിയിലേക്ക് ഒഴുകിയെത്തുന്നത്.

പ്രധാന ചടങ്ങുകൾ

• കൊടിയേറ്റം: തിരുനാൾ ആഘോഷങ്ങൾക്ക് ഔദ്യോഗികമായി തുടക്കം കുറിച്ചുകൊണ്ട് പള്ളിമുറ്റത്തെ കൊടിമരത്തിൽ തിരുനാൾ പതാക ഉയർത്തുന്നു.

• പ്രധാന തിരുനാൾ ദിനങ്ങൾ: ആഘോഷമായ ദിവ്യബലി, ലദീഞ്ഞ്, പ്രകീർത്തനങ്ങൾ, വർണ്ണാഭമായ പ്രദക്ഷിണങ്ങൾ എന്നിവ ഇതിന്റെ ഭാഗമായി നടക്കുന്നു.

• അത്ഭുത രൂപം എഴുന്നള്ളിക്കൽ (കൂടുതുറക്കൽ): പ്രധാന തിരുനാൾ ഞായറാഴ്ച പുലർച്ചെ 5 മണിക്ക് കൊരട്ടിമുത്തിയുടെ അത്ഭുത തിരുസ്വരൂപം പൊതുവണക്കത്തിനായി മഠത്തിൽ നിന്നും പള്ളിയിലേക്ക് എഴുന്നള്ളിക്കുന്നു.

• എട്ടാമിടം (Octave): പ്രധാന തിരുനാളിന് ശേഷമുള്ള എട്ടാം ദിനത്തിൽ (അടുത്ത ശനി, ഞായർ) എട്ടാമിടം ആഘോഷിക്കുന്നു.

• പതിനഞ്ചാമിടം: തിരുനാൾ ആഘോഷങ്ങളുടെ 15-ാം ദിനത്തിൽ പ്രത്യേക നന്ദി അർപ്പണ കുർബാനയോടെയും കൊടിയിറക്കത്തോടെയും ആഘോഷങ്ങൾ സമാപിക്കുന്നു.

പ്രധാന വഴിപാടുകളും ആചാരങ്ങളും

• പൂവൻകുല നേർച്ച: കൊരട്ടിമുത്തിയുടെ ഏറ്റവും പ്രധാനപ്പെട്ട വഴിപാടാണ് പൂവൻകുല അർപ്പണം.

• തുലാഭാരം: രോഗശാന്തിക്കും ആഗ്രഹസാഫല്യത്തിനുമായി ഭക്തർ സ്വന്തം ഭാരത്തോളം പൂവൻ പഴങ്ങൾ തൂക്കി നേർച്ചയർപ്പിക്കുന്നു.

• അടിമ വയ്ക്കൽ: കുഞ്ഞുങ്ങളെ കൊരട്ടിമുത്തിയുടെ സംരക്ഷണത്തിനായി അടിമയായി സമർപ്പിക്കുന്ന ചടങ്.

• മുട്ടുകുത്തി പ്രാർത്ഥന: പാപപരിഹാരത്തിനായും പ്രത്യേക ആഗ്രഹങ്ങൾക്കായും ഭക്തർ പള്ളിമുറ്റത്തുനിന്നും അൾത്താരയിലേക്ക് മുട്ടുകുന്തി നീന്തി പ്രാർത്ഥിക്കുന്നു.